ამირან გამყრელიძის მიერ ვრცელდება ცრუ ინფორმაცია, რომ ჩემს რძალს ვირუსთან ერთად ჰქონდა რაღაც, მძიმე ქრონიკული დაავადება - მანანა იმედაძე

კომპოზიტორი მანანა იმედაძე, H1N1 ვირუსით 22 წლის ქალის გარდაცვალების შესახებ, დაავადებათა კონტროლის ცენტრის დირექტორის, ამირან გამყრელიძის განცხადებას ეხმაურება. კომპოზიტორი წერს, რომ მის რძალს, რომელიც ღორის გრიპის დიაგნოზით გარდაიცვალა, სხვა ქრონიკული დაავადება არ ჰქონია და გამყრელიძე ცრუ ინფორმაციას ავრცელებს.

• ამირან გამყრელიძე 22 წლის გოგოს გარდაცვალებაზე - აქ H1N1-თან ერთად იყო საკმაოდ მძიმე დაავადება

"დაავადებათა კონტროლის ცენტრის დირექტორის - ამირან გამყრელიძის მიერ ვრცელდება ცრუ ინფორმაცია, რომ ჩემს სალომეს ვირუსთან ერთად ჰქონდა რაღაც, მძიმე ქრონიკული დაავადება, რომელსაც თითქოს ვერ აცხადებს ჩვენი, ანუ ოჯახის თანხმობის გარეშე, რაც არის სრული აბსურდი!!!!!!!!!! ძალიან გთხოვთ, რომ თავი შეიკავოთ ასეთი ცრუ განცხადებებისგან, რადგან ოჯახს ისედაც გვეყოფა, რა საშინელი ტრაგედიაც დაგვატყდა თავს!!!!", - წერს მანანა იმედაძე.

22 წლის სალომე ქემაშვილი გუშინ, ინფექციურ საავადმყოფოში, ერთკვირიანი სიკვდილთან ბრძოლის შემდეგ გარდაიცვალა. დღეს, დაავადებათა კონტროლის ცენტრის დირექტორმა, ამირან გამყრელიძემ ჟურნალისტებს განუცხადა, რომ ახალგაზრდა ქალს, H1N1- თან ერთად, საკმაოდ მძიმე დაავადება ჰქონდა.

ვფლობთ 22 წლის ქალბატონის გარდაცვალების შესახებ ინფორმაციას - H1N1-თან ერთად იყო საკმაოდ მძიმე დაავადება, - ამის შესახებ დაავადებათა კონტროლის ცენტრის დირექტორმა ამირან გამყრელიძემ 22 წლის ქალის გრიპით გარდაცვალების ფაქტზე კომენტირებისას განაცხადა და აღნიშნა, რომ დეტალებზე ვერ ისაუბრებს პაციენტის უფლებებიდან გამომდინარე.

• თბილისში, სავარაუდოდ, "ღორის გრიპის" ვირუსით ახალგაზრდა ქალი გარდაიცვალა

"ვფლობთ ამ სამწუხარო შემთხვევის, 22 წლის ქალბატონის გარდაცვალების შესახებ ინფორმაციას. კიდევ ერთხელ მინდა მედიას მოგმართოთ, რომ ქვეყანაში არსებობს კანონი პაციენტის უფლებების შესახებ. ამ კანონის მიხედვით, თუ ოჯახის თანხმობა არაა, მე პერსონალიებზე საუბარი არ შემიძლია ღია ეთერში. ვფლობ ინფორმაციას, სამწუხარო შემთხვევაა, მაგრამ იქ H1N1-თან ერთად იყო საკმაოდ მძიმე დაავადება", - განაცხადა ამირან გამყრელიძემ.