ავტორი:

"რომ არა გიას დიდი თანადგომა, ნამდვილად გამიჭირდებოდა ამ ყველაფრის გაძღოლა" - გია ბაღაშვილისა და თამუნა ტაბატაძის ოჯახური იდილია

"რომ არა გიას დიდი თანადგომა, ნამდვილად გამიჭირდებოდა ამ ყველაფრის გაძღოლა" - გია ბაღაშვილისა და თამუნა ტაბატაძის ოჯახური იდილია

მუსიკოსი გია ბაღაშვილი ულამაზეს მეუღლესთან, თამუნა ტაბატაძესთან ერთად 4 შვილს ზრდის. ტრადიციულ ქართულ ოჯახში დედას და მამას ფუნქციები გადანაწილებული აქვთ და ბავშვების აღზრდა-განვითარებაში თანაბრად არიან ჩართულნი. ორი წლის წინ, ხელოვანთა ოჯახს ერთი ახალი წევრი - ანასტასია შეემატა. მან კიდევ უფრო დიდი სიხარული და ბედნიერება შესძინა ბაღაშვილი-ტაბატაძის წყვილს. თამუნა ტაბატაძე ფოტომოდელი, მომღერალი და მოცეკვავეა. მას მსახიობ ოდრი ჰეპბერნს ამსგავსებენ, მსგავსება სოციალურ ქსელში თამუნას გვერდზე გამოქვეყნებული ფოტოებიდანაც კარგად ჩანს... წყვილი ხშირად მოგზაურობს და 4 შვილის აღზრდას აქტიურ შემოქმედებით ცხოვრებას წარმატებით უთავსებს. გთავაზობთ ამონარიდს "რეიტინგთან" მათი ინტერვიუდან და ოჯახურ ფოტოებს "ინსტაგრამიდან":

- დები დიდი სიხარულით შეხვდნენ ანასტასიას მოვლინებას ამქვეყნად. ნინის ეჭვიანობის ეტაპი გავლილი ჰქონდა ჯერ ლიზას, ხოლო შემდეგ მარიამის დაბადების შემდეგ. ლიზამ, თავის მხრივ ეჭვიანობის ეტაპი ამოწურა მარიამთან დაკავშირებით. ასე რომ, უფროსებს მხოლოდ დადებითი მოლოდინი ჰქონდათ. მათ კვალდაკვალ, მარიამიც ისეთი სიხარულით განეწყო მასზე უმცროსი დაიკოს შესახვედრად, რომ საერთოდ არ ჰქონია ეჭვიანობის ნატამალიც კი. ძალიან საყვარელი სანახავია, როდესაც ოთხივე ერთად თამაშობენ ანასტასიას მანეჟში.

- გინდოდათ, რომ მრავალშვილიანი ოჯახი გქონოდათ, თუ უბრალოდ ასე მოხდა, რომ დღეს 4 გოგოს მშობლები ხართ?

გია:

- ახალ ბინაში გადმოსვლის დროს, ნივთების გადმოტანისას, წავაწყდი ჟურნალს, სადაც ჩემი და თამუნას 9 წლის წინანდელი, პირველი ერთობლივი ინტერვიუ იყო დაბეჭდილი. იქ ჟურნალისტის დასმულ კითხვაზე, თუ რამდენი შვილის ყოლას ვაპირებდით, ასე ვპასუხობთ: სულ მცირე ოთხი შვილის, დანარჩენი როგორც ღმერთი მოგვცემს. ნეტავ ჩვენი პოლიტიკოსები ასრულებდნენ წინასაარჩევნო დაპირებებს ისე პირნათლად, როგორც ჩვენ შევასრულეთ ჩვენი დაპირება.

- რა სირთულეებთან არის მრავალშვილიანობა დაკავშირებული?

თამუნა:

- მრავალშვილიანობა უდიდესი ბედნიერება და ღვთის საჩუქარია. არაფერი შეედრება პატარების ჟრიამულით გამოწვეულ სიხარულს. რაც შეეხება სირთულეებს, პირველ რიგში, ბავშვებისთვის დროისა და ყურადღების თანაბრად განაწილებასთან არის დაკავშირებული.

გია:

- კიდევ ერთ სირთულეს დავამატებდი, ეს არის მშობლის, ძირითადად, რა თქმა უნდა, დედის უძილო ღამეები. არაერთხელ მიფიქრია, წლების მანძილზე, ძილის დეფიციტის მიუხედავად, როგორ ახერხებს თამუნა, ყველას გაგვინაწილოს მაქსიმალური ყურადღება და სითბო. საიდან იღებს ამხელა ენერგიას? ალბათ, პირველ რიგში, თავად პატარებისგან.

თამუნა:

- რომ არა გიას დიდი თანადგომა, ნამდვილად გამიჭირდებოდა ამ ყველაფრის გაძღოლა. გია არის ადამიანი, რომელსაც შემიძლია თამამად დავეყრდნო ნებისმიერ სიტუაციაში და მისი იმედი მქონდეს. ამასთან, ძალიან მზრუნველია და ყოველთვის ახერხებს ჩემთვის სიხარულის მონიჭებას.

- როგორია აღზრდის თქვენეული მიდგომები - ხართ მკაცრები და ფიქრობთ, რომ დიახ, შენიშვნებით უნდა ისწავლონ ბავშვებმა, თუ პირიქით, ცდილობთ, ნაკლებად დასტრესოთ პატარები და არ მისცეთ შენიშვნა გამოუვალი მდგომარეობის გარდა?

გია:

- ვფიქრობ, მთავარია, სიყვარულის გარემოში იზრდებოდნენ ბავშვები. შენიშვნებსა და შეგონებებზე მეტად, კი, რა თქმა უნდა, პირადი მაგალითი მოქმედებს. კარგი გამონათქვამია, თუ გინდა ბავშვში რაიმე შეცვალო, საკუთარ თავში შეცვალე და ის შენ მოგბაძავსო.

თამუნა:

- გია იდეალური მამაა და გოგონების დიდი მესაიდუმლეა. სამსახურიდან დაბრუნებულს უზიარებენ დღის ამბებს და უკვე რჩევებსაც ეკითხებიან. ძალიან უყვართ მამიკოსთან თამაში და ხშირად რეპეტიციებზეც დაყვებიან. მიხარია, რომ გიას და მე ერთნაირი ხედვა გვაქვს ბავშვების აღზრდასთან დაკავშირებით.

გია:

- თამუნა არაჩვეულებრივად ახერხებს ბავშვებთან ურთიერთობაში ბალანსის შენარჩუნებას სითბოსა და კონტროლს შორის. საერთოდ ამ ბალანსის გამოძებნა უმთავრესი რამ მგონია პატარების სწორად აღზრდის საქმეში, რათა ერთი მხრივ, გარკვეული წესების დაცვას მიეჩვიონ ხოლო მეორე მხრივ, არ მოაკლდეთ სიხარული და დადებითი ემოციები.

- თამუნა, ოთხი შვილის დედა ხართ, როგორ ინარჩუნებთ ფორმას?

- ფორმის შენარჩუნებისთვის, როგორც წესი, დიდი ძალისხმევა არ მჭირდება ხოლმე. ოთხი ბავშვის მოვლა თავისთავად მუდმივი ვარჯიშია (იცინის). თუმცა, როცა დრო მაქვს, ვცდილობ, დავკავდე სხვადასხვა ფიზიკური აქტივობებით, როგორიცაა ქართული ცეკვის რეპეტიციები, ფიტნესი და ფეხით სიარული გიასთან და ბავშვებთან ერთად.

- თქვენს ოჯახში არსებობს „კაცის“ და „ქალის“ საქმე? თუ საჭიროების მიხედვით ინაწილებთ საკეთებელს?

თამუნა:

- გიას ძალიან დატვირთული რეჟიმი აქვს, ამიტომ, ვცდილობ, მაქსიმალურად მოვარიდო საოჯახო საქმეები.

- აპირებთ კიდევ შვილების ყოლას?

თამუნა:

- შვილები ყველაზე დიდი ბედნიერებაა. ვფიქრობ, რაც მეტი პატარა იქნება ოჯახში, მით მეტი სიხარულია.

- როგორ ფიქრობთ, მზრუნველობის გარდა, რა არის მთავარი შვილებისა და მშობლების ურთიერთობაში?

გია:

- გულწრფელობა, ბავშვის პიროვნული ღირსების პატივისცემა და უპირობო სიყვარული.

სალომე ჭაჭუა უცხოეთში მიემგზავრება - რომელი ქვეყნის "ცეკვავენ ვარსკვლავებში" გამოჩნდება მოცეკვავე

"სადაც არ უნდა ყოფილიყო, ყოველთვის სახლში ბრუნდებოდა... თბილისში..." - რას წერს გენიალურ კომპოზიტორზე ხელოვნებათმცოდნე

„თბილისური ჩუქურთმა“ - იმპრესიონისტი მხატვრის გამოფენა, რომელიც თბილისობას ეძღვნება