მსოფლიოს სხვადასხვა ადგილას შავი ჭირის ახალი შემთხვევები გამოვლინდა - ერთ-ერთი მსხვერპლი 15 წლის მოზარდია

მსოფლიოს სხვადასხვა ადგილას შავი ჭირის ახალი შემთხვევები გამოვლინდა. sky.com-ის ცნობით, ამ დაავადებით მონღოლეთში 15 წლის მოზარდი გარდაიცვალა. გამოცემა აღნიშნულს მონღოლეთის ჯანდაცვის მინისტრის ინფორმაციაზე დაყრდნობით წერს.

მონღოლეთის ჯანდაცვის სამინისტროში აცხადებენ, რომ მოზარდმა ვირზაზუნას ხორცი შეჭამა და მომაკვდინებელი დაავადებით სწორედ აღნიშნულის შედეგად დაავადდა.

როგორც sky.com წერს, შემთხვევა მონღოლეთის დასავლეთ პროვინციაში მოხდა. ამ ეტაპზე კარანტინშია გადაყვანილი 15 ადამიანი, ის პირები, რომლებსაც 15 წლის ბიჭთან ჰქონდათ კონტაქტი.

შავი ჭირის შემთხვევა გამოვლინდა აშშ-ში, კოლორადოში, თუმცა ამ შემთხვევაში ინფიცირებული ციყვია, ამის შესახებ CNN წერს. გამოცემის ცნობით, ციყვს შავი ჭირი 11 ივლისს გამოუვლინდა. მეცნიერები ამ შემთხვევას საყურადღებოდ მიიჩნევენ, რადგანაც როგორც ცნობილია, დაავადება ცხოველიდან ადამიანზე მარტივად გადადის.

აღსანიშნავია, რომ 2020 წელს ეს შავი ჭირის პირველი შემთხვევა არ არის. აქამდე ის ჩინეთში გამოვლინდა.როგორც BBC წერს, შავი ჭირი შემთხვევა ჩინეთის შიდა მონღოლეთის ავტონომიური რეგიონის ქალაქ ბაიანურში დაფიქსირდა. ინფიცირებულია ერთი ადამიანი, მწყემსი, რომელიც ამ დროისთვის იზოლაციაშია. უცნობია, როგორ დაინფიცირდა ის, უცნობია ინფიცირების წყარო. ქვეყანაში გააძლიერეს სიფრთხილის ზომები და მესამე დონის განგაში გამოაცხადეს.

ეს იმას ნიშნავს, რომ აიკრძალა ნადირობა იმ ცხოველებზე, რომლებიც შესაძლოა შავი ჭირის მატარებელნი იყონ, ასევე აიკრძალა მათი ხორცის ჭამა.

დაავადებამ შუა საუკუნეებში 50 მილიონამდე ადამიანი შეიწირა, შავი ჭირი ჩვენს დროში აღარაა ისეთი სახიფათო, როგორც ადრე, თუმცა დროული ჩარევა აუცილებელია იმისთვის, რომ მკურნალობა ეფექტური იყოს.