"მათე ბიჭი წავიდა ჩვენგან! ძალიან მწარე ხარ, შვილო..." - რას წერს სკოლა 12 წლის ბიჭზე, რომელიც ლისის გზაზე ავარიისას პატრულმა იმსხვერპლა

30 აგვისტოს, დაახლოებით 23:00 საათზე ლისის გზაზე მოძრავი საპატრულო პოლიციის ავტომანქანა, ქვეითად მოსიარულე 12 წლის ბავშვს შეეჯახა, რომელიც ჟვანიას სახელობის საავადმყოფოში გადაყვანის შემდეგ გარდაიცვალა.

ავტოსაგზაო შემთხვევაში ბრალდებულ პატრულ-ინსპექტორს, ირაკლი ცომაიას აღკვეთის ღონისძიების სახით პატიმრობა შეეფარდა. ირაკლი ცომაიამ გირაოს სანაცვლოდ გათავისუფლების მოთხოვნაზე უარი განაცხადა და მან წარდგენილ ბრალდებაში თავი სრულად სცნო დამნაშავედ.

ტრაგედიას სოციალურ ქსელში ეხმაურება სკოლა, სადაც გარდაცვლილი ბავშვი, მათე გოგია სწავლობდა.

"რამდენიმე დღეც და სასწავლო წელი დაიწყება. ჩვენი სკოლისთვის უდიდესი ტრაგედიით... რამდენიმე დღეა ვცდილობთ რაღაც ფორმით გამოვხატოთ დამოკიდებულება მომხდარი ფაქტისადმი, თუმცა გვიჭირს ძალიან... ალბათ ყველა სიტყვა ფუჭია... რამდენიმე დღე N23 საჯარო სკოლის მოსწავლეები, მასწავლებლები, მშობლები მივდიოდით ერთ ქუჩაზე, ერთ ულამაზეს ოჯახში... და ვემშვიდობებოდით ჩვენს მზე - ბიჭს, - მათე გოგიას, მხიარულ და საყვარელ ბიჭს. ის გაუგებრობის და დაუდევრობის მსხვერპლია.

შეძრულია მთელი სკოლა, ყველა მოსწავლე თუ კურსდამთავრებული. არ არსებობს დასამშვიდებელი სიტყვები, რომელიც შეიძლება ვუთხრათ შოთიკოს და სალომეს, მათეს მშობლებს, არც ერთს ფასი არ ექნება... უბრალოდ ძალიან გთხოვთ - გაუძელით! ჩვენ - მასწავლებლები, მათესა და ლუკას თანაკლასელები თუ მეგობრები, მშობლები, ყველანი ვართ თქვენს გვერდით, ლუკას გვერდით... ვიზიარებთ თქვენს მწუხარებას... და გაიზიარეთ ჩვენი - სკოლის მწუხარება: მათე ბიჭი წავიდა ჩვენგან! წავიდა მეგობრებზე უზომოდ შეყვარებული ბიჭი... დედისა და მამის გულის ნაწილი, ლუკას დიდი ტკივილი... ძალიან მწარე ხარ, შვილო...", - აღნიშნულია სკოლის განცხადებაში.

• "მოზარდის გარდაცვალება ფარავს ყველაფერს, რომ რაიმე საშეღავათო პირობა მოვითხოვოთ" - ავტოსაგზაო შემთხვევაში ბრალდებულ პატრულ-ინსპექტორს პატიმრობა შეეფარდა